Astapadi 18

Astapadi 18

हरिरभिसरति वहति मधुपवने ।

किमपरमधिकसुखं सखि भुवने ॥

माधवे मा कुरु मानिनि मानमये  ॥ १॥

Harirabhisarati vahati madhupavane ।

Kimaparamadhikasukham sakhi bhuvane ॥

Mādhave mā kuru mānini mānamaye ॥ 1 ॥

तालफलादपि गुरुमतिसरसम् ।

किं विफलीकुरुषे कुचकलशम् ॥ २॥ माधवे

Tālaphalādapi gurumatissarasam ।

Kim viphalīkuruṣe kucakalasham ॥ 2 ॥ Mādhave

कति न कथितमिदमनुपदमचिरम् ।

मा परिहर हरिमतिशयरुचिरम् ॥ ३॥ माधवे

Kati na kathitamidamanupadamaciram ।

Mā pari-hara harimatishayaruciram ॥ 3 ॥ Mādhave

किमिति विषीदसि रोदिषि विकला ।

विहसति युवतिसभा तव सकला ॥ ४॥ माधवे

Kimiti viṣīdasi rodiṣi vikalā ।

Vihasati yuvatisabhā tava sakalā ॥ 4 ॥ Mādhave

मृदुनलिनीदलशीतलशयने ।

हरिमवलोकय सफलय नयने ॥ ५॥ माधवे

Mṛdunalinīdalashītalashayane ।

Harimavalokaya saphalaya nayane ॥ 5 ॥ Mādhave

जनयसि मनसि किमिति गुरुखेदम् ।

श‍ृणु मम वचनमनीहितभेदम् ॥ ६॥ माधवे

Janayasi manasi kimiti gurukhedam ।

Shṛṇu mama vachanamanīhitabhedam ॥ 6 ॥ Mādhave

हरिरुपयातु वदतु बहुमधुरम् ।

किमिति करोषि हृदयमतिविधुरम् ॥ ७॥ माधवे

Hirirupayātu vadatu bahumadhuram ।

Kimiti karoṣi hṛdayamatividhuram ॥ 7 ॥ Mādhave

श्रीजयदेवभणितमतिललितम् ।

सुखयतु रसिकजनं हरिचरितम् ॥ ८॥ माधवे

Shrījayadevabhaṇitamati-lalitam ।

Sukhayatu rasikajanam haricharitam ॥ 8 ॥ Mādhave

स्निग्धे यत्परुषासि यत्प्रणमति स्तब्धासि यद्रागिणि

द्वेषस्थासि यदुन्मुखे विमुखतां यातासि तस्मिन्प्रिये ।

तद्युक्तं विपरीतकारिणि तव श्रीखण्डचर्चा विषं 

शीतांशुस्तपनो हिमं हुतवहः क्रीडामुदो यातनाः ॥ ५९॥

Snigdhe yatparuṣāsi yatpraṇamati stabdhāsi yad-rāgiṇi

Dveṣasthāsi yadunmukhe vimukhatāṁ yātāsi tasmin priye ।

Tadyuktaṁ viparītakāriṇi tava śrīkhaṇḍacharchā viṣaṁ

Shītāṁśutapano himaṁ hutavahaḥ krīḍāmudo yātanāḥ ॥ 59 ॥

सान्द्रानन्दपुरन्दरादिदिविषद्वृन्दैरमन्दादरा-

दानम्रैर्मकुटेन्द्रनीलमणिभिः सन्दर्शितेन्दिन्दिरम् ।

स्वच्छन्दं मकरन्दसुन्दरगलन्मन्दाकिनीमेदुरं

श्रीगोविन्दपदारविन्दमशुभस्कन्दाय वन्दामहे ॥ ६०॥

Sāndrānandapurandarādidivṛndairamandādarā-

Dānamrairmakuṭendranīlamaṇibhiḥ sandarśitendiram ।

Svachchhandaṁ makarandasundaragalannandākinīmeduraṁ

Shrīgovindapadāravindamaśubhaskandāya vandāmahe ॥ 60 ॥

॥ इति गीतगोविन्दे कलहान्तरितावर्णने मन्दमुकुन्दो नाम नवमः सर्गः ॥

॥ Iti gītagovinde kalahaantaritāvarṇane mandamukundo nāma navamaḥ sargaḥ ॥